- బిజీ లైఫ్ లో పెరిగిన ప్రాసెస్డ్ ఫుడ్ వినియోగం
- ప్రాసెస్డ్ ఫుడ్ లో రసాయనాలు ప్రమాదకరమన్న పరిశోధకులు
- ఆకుకూరలు, కాయగూరలు, గింజ ధాన్యాలు, పండ్లు మేలని సూచన ఉరుకుల పరుగుల యుగంలో శుద్ధి చేసిన ఆహార పదార్థాల వినియోగం బాగా పెరిగింది. అయితే ఈ ప్రాసెస్డ్ ఫుడ్ కారణంగా ప్రాణాంతక క్యాన్సర్ బారినపడే అవకాశం ఉందని నిపుణులుహెచ్చరిస్తున్నారు. శుద్ధి చేసిన ఆహార పదార్థాలు ఆరోగ్యానికి హానికరం అని గతంలోనే తెలిసినా, వీటితో వివిధ రకాల క్యాన్సర్ల ముప్పు కూడా ఉందని తాజా అధ్యయనంతో మరింత స్పష్టమవుతోంది.
- హార్వర్డ్ యూనివర్సిటీ తాజాగా చేసిన ఓ అధ్యయనం ప్రకారం దీర్ఘకాలం పాటు ప్రాసెస్డ్ ఫుడ్ తింటే గుండె జబ్బులతోపాటు కేన్సర్ వంటి ప్రమాదాలు తప్పవని హెచ్చరిస్తోంది. పేగులకు కూడా ఏది మంచి ఆహారం ఏది చెడ్డ ఆహారం అని కూడా వీరు గుట్టు విప్పే ప్రయత్నం చేసి పలు విషయాలను తేల్చారు. ప్రాసెస్డ్ మీట్, స్వీట్స్, రిఫైన్డ్ గ్రెయిన్స్ ఉన్న ఆహారాన్ని అతిగా తీసుకున్నా, దీర్ఘకాలం తీసుకున్నా రోగాలు చుట్టుముడతాయి. పెద్ద పేగు క్యాన్సర్ తో పాటు హృద్రోగాలు, స్ట్రోక్, డయాబెటిస్ వంటి సమస్యల బారిన పడే ప్రమాదాలు ఇటువంటి ఆహార పదార్థాలు తీసుకునేవారిలో చాలా ఎక్కువని తేలింది. 32 ఏళ్లపాటు సాగిన సుదీర్ఘ అధ్యయనంలో 2,10,000 మంది పాల్గొన్నారు.
ప్రపంచవ్యాప్తంగా క్యాన్సర్ తో బాధపడుతున్న వారిలో, చాలామంది శుద్ధి చేసిన ఆహారం తీసుకోవడం కారణంగానే క్యాన్సర్ కు గురైనట్టు లండన్ లోని ఇంపీరియల్ కాలేజి పరిశోధకులు గుర్తించారు. అధ్యయనంలో భాగంగా 2 లక్షల మంది క్యాన్సర్ బాధితులను పరిశీలించారు. వారు తీసుకున్న ప్రాసెస్డ్ ఫుడ్ కి, క్యాన్సర్ కు దగ్గరి సంబంధం ఉన్నట్టు తెలుసుకున్నారు.
ఈ ప్యాకేజ్డ్ ఫుడ్ ను నిల్వ చేసేందుకు వాడే రసాయనాలు, ఫుడ్ కలర్లు, ఆర్టిఫిషియల్ ఫ్లేవర్లు అన్నీ కలిసి క్యాన్సర్ ముప్పును పెంచుతున్నాయని ఇంపీరియల్ కాలేజి పరిశోధకులు వెల్లడించారు. అంతేకాదు, శుద్ధిచేసిన ఆహారాల ప్యాకింగ్ లో ఉపయోగించే మైక్రో ప్లాస్టిక్ పదార్థాలు, రసాయనాలు కూడా క్యాన్సర్ కు కారణమవుతున్నాయని వివరించారు.
ముఖ్యంగా, కృత్రిమంగా తీపిదనాన్ని అందించే పదార్థాల వల్ల రొమ్ము, ప్రొస్టేట్ క్యాన్సర్ల బారినపడుతున్నారట. ప్రాసెస్డ్ ఆహార పదార్థాలను అధిక ఉష్ణోగ్రత వద్ద ఉడికించడం వల్ల అండాశయ, ఎండోమెట్రియల్ క్యాన్సర్ల బారినపడుతున్నట్టు వెల్లడైంది.
ఈ నేపథ్యంలో, శుద్ధి చేసిన ఆహారాలను ఎంత ఎక్కువగా తీసుకుంటే క్యాన్సర్ ముప్పు అంత అధికంగా ఉంటుందని పరిశోధకులు స్పష్టం చేస్తున్నారు. అందుకే, ప్రాసెస్డ్ ఫుడ్ కి దూరంగా ఉండాలని, నిత్యం ఆహారంలో ఆకుకూరలు, కాయగూరలు, పండ్లు, గింజ ధాన్యాలను ఎక్కువగా ఉండేలా చూసుకోవాలని సూచిస్తున్నారు.