అమరావతి రైల్వే లైన్ వెళ్లే పలు గ్రామాల రైతులు, స్థానిక ఎమ్మెల్యేలతో మున్సిపల్, పట్టణాభివృద్ధి శాఖ మంత్రి నారాయణ భేటీ అయ్యారు. రైల్వే లైన్ కోసం భూసేకరణ కింద కాకుండా ల్యాండ్ పూలింగ్ ద్వారా భూములు తీసుకోవాలని మంత్రిని రైతులు ఈ సందర్భంగా కోరినట్లు తెలుస్తోంది. రాజధానిని ఆనుకుని ఉన్న గ్రామాలు కావడంతో తమకూ పూలింగ్ అవకాశం ఇవ్వాలని రైతులు కోరారు. అయితే, సీఎంతో చర్చించి నిర్ణయం తీసుకుంటామని మంత్రి నారాయణ వారికి తెలిపారు. రైతులకు న్యాయం జరిగేలా చూస్తానని ఈ సందర్భంగా హామీ ఇచ్చారు.
అమరావతి మీదుగా వెళ్లే కొత్త రైల్వే లైన్ పరిధిలో పెదకూరపాడు, తాడికొండ నియోజకవర్గాల పరిధిలోని కర్లపూడి, పెదపరిమి, తాడికొండ, నిడుముక్కల గ్రామాలు ఉన్నాయి. దీంతో ఈ గ్రామాల రైతులు, ఎమ్మెల్యేలు భాష్యం ప్రవీణ్, శ్రావణ్ కుమార్‌తో మంత్రి సమావేశమయ్యారు. మరో వైపు విజయవాడలో మున్సిపల్ కార్పోరేషన్ అధికారులు, ప్రజా ప్రతినిధులతో మంత్రి నారాయణ సమీక్ష నిర్వహించారు. సీఆర్డీఏ కేంద్ర కార్యాలయంలో జరిగిన ఈ సమావేశంలో ఎమ్మెల్యేలు బొండా ఉమా, గద్దె రామ్మోహన్, వీఎంసీ కమిషనర్ ధ్యానచంద్ర, ఇతర అధికారులు పాల్గొన్నారు. వీఎంసీ పరిధిలో చేపట్టాల్సిన అభివృద్ధి కార్యక్రమాలు, పెండింగ్ పనులు, టౌన్ ప్లానింగ్ అంశాలపై మంత్రి చర్చించి అధికారులకు పలు సూచనలు చేశారు.