విశాఖ సిటీ వేగంగా అభివృద్ధి చెందే నగరం. ఇంటర్ నేషనల్ గా సంబంధాలున్న నగరం. ఇప్పుడు అందుకే సైబర్ నేరగాళ్లకు ఒక ప్రయోగశాలగా మారింది. వారు చేసే అన్నిరకాల మోసాలను వైజాగ్‌ వాసులపై ప్రయోగిస్తున్నారు. దీంతో చాలామంది సైబర్ నేరగాళ్ల వలలో పడి డబ్బులు పోగొట్టుకుంటున్నారు. ఇటీవల హనీట్రాప్‌ కేసు విశాఖను కుదిపేస్తుంది. జమీనాను అడ్డుపెట్టుకుని పెద్దగ్యాంగ్ బాధితులను బెదిరించి డబ్బు వసూలు చేసినట్టు గుర్తించారు పోలీసులు.
విశాఖలో కోట్లకు కోట్లు ఈజీ మనీ వస్తుంటే చైనా నుంచి పనిచేయడం ఏంటి అనుకున్నారో ఏమో.. ఏకంగా ఇక్కడే ఓ కాల్‌ సెంటర్‌నే తెరిచింది సైబర్ ముఠా. విశాఖ కేంద్రంగా స్టాక్ మార్కెటింగ్, ఫెడెక్స్, ఆన్లైన్ మోసాలకు పాల్పడింది. సీ స్మైల్ అపార్ట్‌మెంట్‌లో దాడులు చేసి ఫెడెక్స్ స్కామ్, ఆన్లైన్ మెసాలకు పాల్పడుతున్న ముఠాల ఏడుగురిని పోలీసులు అరెస్ట్‌ చేశారు. ఈ ముఠా కాయ్‌ ఎన్నో ఆన్లైన్ బెట్టింగులకు పాల్పడి డబ్బును చైనా, తైవాన్‌కు చేరవేసినట్టు గుర్తించారు.
మరోవైపు డిజిటల్ అరెస్టుల పేరుతో వైద్యులు, ఉన్నత చదువులు చదువుకున్నవారి దగ్గరి నుంచి డబ్బు వసూలు చేస్తున్నారు ఆన్లైన్ మోసగాళ్లు. విశాఖపట్నంలో నమోదవుతున్న కేసులు అందరినీ భయపెడుతున్నాయి. మహిళలు, యువతులే టార్గెట్‌గా చేసుకుని తప్పుడు ప్రచారాలు అసభ్యకరమైన మెసేజ్‌లు హడలెత్తిస్తున్నాయి. ఏ సమయంలో ఎవరి వంతు వస్తుందేమోనని మహిళలు, యువతులు భయపడిపోతున్నారు. వర్కింగ్ ఉమెన్లు, కంపెనీల్లో పనిచేసే మహిళలు, యువతులను టార్గెట్ చేస్తున్నారు. ఫేక్‌ ఐడీలతో వేధింపులకు గురిచేస్తున్నారు.
అంతేకాదు విదేశాల్లో డేటా ఎంట్రీ ఉద్యోగాల పేరుతో తెలుగువారిని కాంబోడియాకు తీసుకెళ్లి ఆన్లైన్ మోసాలు చేసేలా ట్రైనింగ్ ఇచ్చింది సైబర్ ముఠా. మోసాలకు పాల్పడనందుకు తెలుగు యువకులను చిత్రహింసలకు గురిచేసింది. కొద్ది రోజుల క్రితమే విశాఖ పోలీసులు ఈ ముఠా చేతుల్లో చిక్కిన 58 మందిని రక్షించారు.
సైబర్ నేరాలపై వైజాగ్‌ సీపీ శంఖబ్రత బాగ్చీ ఉక్కుపాదం మోపుతున్నారు. సైబర్ నేరాలపై ప్రజలకు అవగాహన కల్పించేందుకు డాక్యుమెంటరీని రూపొందిస్తున్నారు. ఇప్పటి వరకు ఎలాంటి సైబర్ క్రైంలు జరిగాయి? ఎన్ని విధాలుగా మోసం చేసే అవకాశాలు ఉన్నాయి? అనే దానిపై డాక్యుమెంటరీని సిద్ధం చేస్తున్నారు. డాక్యుమెంటరీ పూర్తయ్యాక థియేటర్లు, బస్టాండ్‌లు, షాపింగ్‌ కాంప్లెక్స్‌లో ప్రదర్శిస్తామన్నారు.