తెలుగు సినిమా ప్రముఖ హాస్య నటుడు బ్రహ్మానందం. ఆయన అంటే తెలియని వారుండరు. బ్రహ్మానందం గుర్తుకొస్తేనే మన ముఖంలో చిరునవ్వు తాండవిస్తుంది. ఆయన కొన్ని వందల సినిమాల్లో నటించారు. జాతీయ స్థాయిలో ఎంతో పేరు ప్రఖ్యాతలు సంపాదించారు. ఆయనకు అభిమానులు కూడా చాలా మందే ఉన్నారు. అలాంటి ఓ అభిమాని ఏకంగా బ్రహ్మానందం పేరుతో ఖమ్మం జిల్లా సత్తుపల్లి లో ఒక ఫాస్ట్ ఫుడ్ సెంటర్ ఓపెన్ చేశాడు. ఆ సెంటర్ లో బ్రహ్మానందానికి ఇష్టమైన వంటకాలు అందుబాటులో ఉంచడం మరీ ప్రత్యేకం.
రాజు అనే యువకుడికి అందరిలా పెద్దపెద్ద హీరోలంటే అంతగా ఇష్టంలేదు. ఆయనకు బ్రహ్మానందం అంటేనే చాలా అభిమానం. ఆ అభిమానం ఆయనను బ్రహ్మానందం పేరుతో ఒక ఫాస్ట్ ఫుడ్ సెంటర్ పెట్టేలా చేసింది. అంతటితో ఆగలేదు. ఆ హోటల్ బ్రహ్మానందం ఫోటోలతో నింపేశాడు. అయితే అక్కడికి వచ్చే వాళ్లు కూడా బ్రహ్మానందం అభిమానులే ఎక్కువగా రావడం మరో విశేషం. ఇలా సత్తుపల్లి పట్టణంలో బ్రహ్మానందం ఫాస్ట్ ఫుడ్ సెంటర్ మంచి ఫేమస్ అయ్యింది.