ఇతర గ్రహాలపై జీవించేందుకు ఏమన్నా అవకాశాలు ఉన్నాయా? అనే కోణంలో విస్తృత పరిశోధనలు సాగుతున్నాయి. అందులో భాగంగా అమెరికా అంతరిక్ష పరిశోధన సంస్థ నాసా కూడా అనేక ప్రయోగాలు చేస్తోంది. ప్రస్తుతం అంగారకుడిపై పరిశోధనలు జరుగుతుండగా ఇప్పుడు జుపిటర్ (గురుగ్రహం) చల్లని చంద్రుడు యూరోపా మానవ నివాస యోగ్యమేనా అనే విషయం తెలుసుకునేందుకు సోమవారం ఫ్లోరిడాలోని కెనడీ స్పేస్ సెంటర్ నుంచి స్పేస్ఎక్స్ ఫాల్కన్ హెవీ రాకెట్‌ను ప్రయోగించింది. యూరోపాపై అపారమైన భూగర్భ సముద్రం ఉందని శాస్త్రవేత్తలు విశ్వసిస్తున్నారు. ఈ నేపథ్యంలో అది మానవ మనుగడకు అనుకూలంగా ఉండే అవకాశం ఉందని భావిస్తున్నారు.
ఏ గ్రహంపైనైనా సముద్రాలు ఉన్నాయా.. అని తెలుసుకునేందుకు నాసా చేపట్టిన తొలి ప్రయోగం ఇదే. ఈ స్పేస్‌క్రాఫ్ట్ యూరోపా క్లిప్పర్ 1.8 బిలియన్ మైళ్లు (2.9 బిలియన్ కిలోమీటర్లు) ప్రయాణించి ఏప్రిల్ 2030 నాటికి జుపిటర్ కక్ష్యలోకి చేరుతుంది. ఈ రోబోటిక్ సోలార్ ఆధారిత ప్రోబ్ కక్ష్యలోకి ప్రవేశించిన తర్వాత యూరోపాపై మానవ నివాసానికి అనువైన పరిస్థితులు ఉన్నాయా? అన్న విషయాన్ని పరిశోధిస్తుంది. ఈ మిషన్ కోసం నాసా 5.2 బిలియన్ డాలర్లు.. మన కరెన్సీలో చెప్పాలంటే రూ. 43,700 కోట్లు ఖర్చు చేసింది. కాగా, 2015లో ఈ మిషన్‌కు అనుమతి లభించగా ఇందుకోసం ఏకంగా 4 వేల మంది పనిచేశారు.