ఐదుగురి దుర్మరణం.. 1.37 లక్షల మంది తరలింపు
వేగంగా విస్తరి0చిన మంటలు.. ఈదురు గాలులు
హాలీవుడ్‌కు ముప్పు.. ఆస్తులు కోల్పోయిన స్టార్లు
ఆస్కార్‌ వేడుకపై నీలినీడలు.. క్రీడా టోర్నీలు రద్దు
వాషింగ్టన్‌, జనవరి 10: అమెరికాలోని లాస్‌ ఏంజెలెస్ లో రగిలిన కార్చిచ్చు అదుపులోకి రావడం లేదు. పాలిసాడ్స్‌ ఫైర్‌.. ఈటన్‌ ఫైర్‌.. సన్‌సెట్‌ ఫైర్‌.. ఇలా వేర్వేరు పేర్లతో ఆరు చోట్ల యుఎస్ లో కార్చిచ్చు రగులుతూనే ఉంది. అమెరికా అధ్యక్షుడు జో బైడెన్‌ కుమారుడు సహా.. పలువురు హాలీవుడ్‌ స్టార్ల ఇళ్లు బుగ్గిపాలవ్వగా.. ఐదుగురు పౌరులు మృతి చెందినట్లు అధికారులు చెపుతున్నారు .
రెండ్రోజుల వ్యవధిలో వేల ఎకరాలు అగ్నికి ఆహుతవ్వగా.. హాలీవుడ్‌ కొండలను అగ్ని కీలలు చుట్టుముట్టాయి . . శుక్రవారం ఉదయం 6 గంటల సమయానికి . . 2,800 పైగా ఆవాసాలు దగ్ధమయ్యాయి . ఆస్తులు, వనరుల నష్టం విలువ రూ.5 లక్షల కోట్లు(57 బిలియన్‌ డాలర్లు)గా ఉంటుందని అంచనా . 1.27 లక్షల మందిని సురక్షిత ప్రాంతాలకు తరలించారు .
హాలీవుడ్‌ చుట్టూ..
లాస్‌ ఏంజెలెస్ కార్చిచ్చులో అతిపెద్దదైన పాలిసాడ్స్‌ ఫైర్‌ కారణంగా 15,650 ఎకరాలు, ఈటన్‌ ఫైర్‌ వల్ల ఆల్టడేన, పసాడెనా ప్రాంతాల్లోని 10 వేల ఎకరాలు, సన్‌సెట్‌ ఫైర్‌ 5 వేలకు పైగా ఎకరాలు, హురెస్ట్‌ ఫైర్‌ సైల్మర్‌లో 700 ఎకరాలు, లిడియా ఫైర్‌ 340 ఎకరాలలో చెట్లు , పంటలు బుగ్గిపాలు అయ్యాయి . ప్రస్తుతం హాలీవుడ్‌ కొండలను చుట్టముట్టిందని, వేగంగా విస్తరిస్తోందని, హెలికాప్టర్ల ద్వారా నీటిని చిమ్ముతున్నా అదుపులోకి రావడం లేదని అధికారులు పేర్కొన్నారు.
స్టూడియో సిటీ, రన్‌యాన్‌కెనాన్‌లో పలు ఇళ్లు, కార్యాలయాలు దగ్ధమయ్యాయి. రియాల్టీ టీవీ స్టార్‌ పారిస్‌ హిల్టన్‌, నటులు యూజిన్‌ లెవీ, బిల్లి క్రిస్టల్‌, జాన్‌ గుడ్‌మన్‌ ఇళ్లు కూడా ఇందులో ఉన్నాయ్ . స్టూడియోసిటీ పరిసరాల్లో చాలామంది సినీతారలు ఇళ్లను, ఆస్తులను కోల్పోయారు. ఇప్పటి వరకు 2 వేల ఇళ్లు (లగ్జరీ విల్లాలు కలిపి) బుగ్గిపాలవ్వగా, రూ.5లక్షల కోట్ల పైనే . , నష్టం వాటిల్లినట్లు అధికారులు లెక్కతేల్చారు. ఈ నష్టం ఇంకా ఎక్కువగా ఉంటుందని, 2005లో నెలకొన్న కార్చిచ్చు తర్వాత ఇదే అతిపెద్ద వినాశకారిగా ఉందని పేర్కొన్నారు.