రజనీకాంత్ హీరోగా టి. జె జ్ఞానవేల్ తెరకెక్కించిన చిత్రం ‘వేట్టయన్’. భారీ అంచనాల మధ్య తాజాగా ప్రేక్షకుల ముందుకువచ్చిన ఈ చిత్రం అభిమానులను అలరిస్తోంది. పాటలతో పాటు రజనీకాంత్ యాక్షన్ కు ఫ్యాన్స్ ఖుషీ అవుతున్నారు. ఈనేపథ్యంలో ఈ సినిమా తొలిరోజు కలెక్షన్లలోనూ రికార్డును నెలకొల్పింది. కోలీవుడ్లో ఈ ఏడాది విడుదలై అత్యధిక కలెక్షన్లు సాధించిన చిత్రాల్లో రెండో స్థానంలో నిలిచింది. తొలిరోజు ప్రపంచవ్యాప్తంగా రూ.60కోట్లు (గ్రాస్) వసూలుచేసినట్లు సమాచారం. విజయ్ ‘ది గోట్’ కలెక్షన్లలో కోలీవుడ్లో తొలిస్థానంలో నిలవగా ‘వేట్టయన్’ రెండో స్థానంలో నిలిచింది. ఈ చిత్రంలో రజనీకాంత్ ని బెస్ట్ గా చూపించారని జ్ఞానవేల్ ను అభిమానులు ప్రశంసిస్తున్నారు.
‘వేట్టయన్’ మంచి విజయం సాధించడంపై రజనీ కుమార్తె సౌందర్య రజనీకాంత్ హర్షం వ్యక్తంచేశారు. చిత్రబృందాన్ని అభినందిస్తూ ఎక్స్ (X) వేదికగా పోస్ట్ పెట్టారు. “ఎప్పటికీ ఒక్కరే తలైవా ఉంటారు. జ్ఞానవేల్ ను చూస్తుంటే గర్వంగా ఉంది. నా సోదరుడు అనిరుధ్ బెస్ట్ మ్యూజిక్ అందించారు. ‘వేట్టయన్’ కంటెంట్ కు తలైవా (Rajinikanth) మాస్ యాక్షన్ కు ఈ చిత్రం బ్లాక్ బస్టర్ విజయాన్ని సొంతం చేసుకుంది. దీన్ని ఆదరించిన అందరికీ ధన్యవాదాలు” అని పోస్ట్ పెట్టారు.