సినిమా: ఎలాంటి సినీ నేపథ్యం లేకుండా ఇండస్ట్రీకి వచ్చి నటి రకుల్ ప్రీత్ సింగ్ గుర్తింపు తెచ్చుకున్నారు. తన కెరీర్ ప్రారంభంలో ఎన్నో అవకాశాలు కోల్పోయానని చెప్పిన రకుల్.. గతంలో ప్రభాస్ సినిమా నుంచి తనను (Rakul Preet Singh) తొలగించడం గురించి మరోసారి మాట్లాడారు. ఓ ఇంగ్లిష్ మీడియాకు ఇచ్చిన ఇంటర్వ్యూలో ప్రభాస్ సినిమాలో తన స్థానంలో కాజల్ ను తీసుకున్నట్లు వెల్లడించారు. “ప్రభాస్ (Prabhas) సరసన ఓ సినిమాలో నాకు అవకాశం వచ్చింది. ఒక షెడ్యూల్ ను కూడా చిత్రీకరించారు. అప్పుడు నేను ఢిల్లీలో చదువుకుంటున్నా. దీంతో షెడ్యూల్ పూర్తి కాగానే తిరిగి ఢిల్లీ వెళ్లిపోయా. అక్కడికి వెళ్లాక రెండో షెడ్యూల్ కోసం ఎన్నిరోజులైనా ఫోన్ రాలేదు. తరవాత తెలిసింది నా స్థానంలో కాజల్ ను తీసుకున్నారని. నాకు కనీస సమాచారం ఇవ్వకుండా ఆ సినిమా నుంచి తొలగించేశారు. అప్పటికే ప్రభాస్- కాజల్ ల (Kajal Aggarwal) కాంబినేషన్లో ఓ సినిమా వచ్చి మంచి విజయం సాధించింది. దీంతో మరోసారి ఆ జోడి రిపీట్ అయితే బాగుంటుందని భావించిన చిత్రయూనిట్ నన్ను తొలగించి తనను తీసుకుంది. సినిమా అనేది ఓ వ్యాపారం.. ఇందులో కొత్తగా పరిశ్రమకు వచ్చిన అమ్మాయిలకు ఇలా జరగడం సహజమే. నాకు ఎన్నోసార్లు ఇలా జరిగింది. ఒక అవకాశం పోయినా.. దానికి మించింది మన కోసం ఎదురుచూస్తుంటుందని నేను భావిస్తా” అని రకుల్ చెప్పారు.
గతంలోనూ రకుల్ నెపోటీజం (Nepotism) కారణంగా తనకు అవకాశాలు రాలేదని వెల్లడించారు. “సినిమా ఛాన్స్ కోల్పోవడం జీవితంలో ఓ భాగం. నాకు దక్కని వాటి గురించి ఆలోచించి సమయం వృథా చేసుకోను. ఏం చేస్తే నేను వ్యక్తిగతంగా ఎదుగుతానో దానిపై శ్రద్ధ పెడతాను. ఒక స్టార్ కిడ్ కు లభించినంత సులభంగా మిగతా వారికి అవకాశాలు రావు. అదంతా వారి తల్లిదండ్రుల కష్టం” అని రకుల్ వివరించారు. ప్రస్తుతం అజయ్ దేవగణ్ (Ajay Devagan)తో జంటగా ‘దే దే ప్యార్ దే 2’ (De De Pyaar De 2) లో రకుల్ నటిస్తున్నారు. విజయవంతమైన ‘దే దే ప్యార్ దే’కి కొనసాగింపుగా అన్షుల్ శర్మ దీన్ని తెరకెక్కిస్తున్నారు. వచ్చే ఏడాది మార్చిలో ఈ సినిమా విడుదల కానుంది.