ప్రాణాంతక సజీవ వైరస్ నమూనాలు ఉన్న వందలాది చిన్న బాటిల్స్ ఆస్ట్రేలియాలోని ఓ ల్యాబ్ నుంచి అదృశ్యమైనట్టు అక్కడి క్వీన్స్‌లాండ్ ప్రభుత్వం ప్రకటించింది. దీంతో ప్రపంచ వ్యాప్తంగా ఆందోళన మొదలైంది. అసలు ఎలా పోయాయి. ఎక్కడికి చేరాయి. వాటి వల్ల ఏ విపరీతం జరగబోతోందోనని ప్రపంచ శాస్త్రవేత్తలు ఆవేదన చెందుతున్నారు. ఈ ఘటనను అతిపెద్ద బయోసెక్యూరిటీ ప్రొటోకాల్స్ ఉల్లంఘనగా ప్రభుత్వం పేర్కొంది.
బయటకు వచ్చిన నివేదిక ప్రకారం వివిధ రకాల సజీవ వైరస్ శాంపిల్స్ కలిగిన 323 వయల్స్ గతేడాది ఆగస్టులో క్వీన్స్‌లాండ్‌లోని పబ్లిక్ హెల్త్ వైరాలజీ ల్యాబొరేటరీ నుంచి మాయమయ్యాయి. తాజాగా విషయం వెలుగులోకి రావడంతో అందరిలోనూ భయాందోళనలు వ్యక్తమవుతున్నాయి. మాయమైన వయల్స్‌లో ప్రమాదకర హెండ్రా వైరస్, లిసావైరస్, హంటావైరస్ వంటివి ఉన్నాయి. హెండ్రా అనేది జూనోటిక్ (జంతువుల నుంచి మనుషులకు సోకేది) వైరస్. దీనిని ఇప్పటి వరకు ఆస్ట్రేలియాలో మాత్రమే గుర్తించారు. హంటావైరస్ అనేది వైరస్‌ల కుటుంబాలకు చెందినది. ఇది తీవ్రమైన అనారోగ్యానికి గురిచేయడంతోపాటు మరణానికి కూడా కారణమవుతుంది. ఇక, లిసా వైరస్ అనేది వైరస్ ల సమూహానికి చెందినది. ఇది సోకితే రేబిస్ వ్యాధి వస్తుంది.
కనిపించకుండా పోయిన ఈ వయల్స్‌ను ఎవరైనా ఎత్తుకెళ్లారా? లేదంటే ధ్వంసమయ్యాయా? అన్న విషయంలో స్పష్టత లేదు. వీటివల్ల సమాజానికి పెద్దగా ముప్పు ఉండకపోవచ్చని అధికారులు తెలిపారు.