రెండు-మూడు గంటల్లో తిరుమల దర్శనం ఎలా? – మళ్లీ ఆ విధానం తీసుకురానున్నారా!
టీటీడీ చైర్మన్ గా బాధ్యతలు స్వీకరించిన బిఆర్ నాయుడు అండ్ టీమ్ తిరుమలేశుని సామాన్యులకు మరింత చేరువ చేయడానికి సంకల్పం చేసున్నట్లు కనిపిస్తోంది. నాయుడు మాత్రం ఈ విషయములో కృత నిశ్చయంతో ఉన్నారు .
కలియుగ ప్రత్యక్ష దైవం తిరుమల శ్రీనివాసుని దర్శనార్థం నిత్యం వేలాదిగా భక్తులు తరలి వస్తుంటారు. ఇందు కోసం 300 రూపాయల ప్రత్యేక ప్రవేశ దర్శనం, 10 వేల 500 రూపాయల ప్రత్యేక దర్శనం, ఆర్జిత సేవలు, స్లాట్‌ దర్శనం, సర్వదర్శనం అని పలు రకాలుగా ఉన్నాయి. అయితే భక్తుల్లో అత్యధికులు సామాన్య భక్తులు ఉంటున్నారు. దీంతో సర్వదర్శనానికి వచ్చే భక్తులకు 2 నుంచి 3 గంటల్లోగా దర్శన భాగ్యం కల్పిస్తామని టీటీడీ ధర్మకర్తల మండలి సమావేశం అనంతరం ఛైర్మన్ బీఆర్ నాయుడు ప్రకటించారు. మరి ఇంత తక్కువ సమయంలో దర్శనం ఎలా అనే దానిపై సాధ్యాసాధ్యాలను ప్రస్తుతం చూద్దాం.
- కంకణం’ విధానంపై సమాలోచన
- రెండు దశాబ్దాల క్రితం ఐవీ సుబ్బారావు టీటీడీ ఈవోగా ఉన్న సమయంలో కంకణాలను ప్రవేశపెట్టారు. ఈ విధానాన్ని ప్రవేశపెడితే ఎలా ఉంటుంది . .. అనే దానిపై బోర్డులో సమాలోచనలు సాగాయి .
- దీని ప్రకారం ప్రతి భక్తుడి చేతికి రిస్ట్‌ బ్యాండ్ తరహాలో ఒక కంకణాన్ని వేస్తారు. ఈ కంకణం వాటర్‌ ప్రూఫ్‌లా ఉంటుంది.
- ఈ కంకణాన్ని తిరుపతిలోని అనేక కేంద్రాలతో పాటు రేణిగుంట తదితర ప్రాంతాల్లో వేసేవారు. ఈ విధానంతో భక్తులకు కేటాయించిన సమయానికి వెళ్తే, రెండు, మూడు గంటల్లో దర్శనం పూర్తవుతుంది.
- ఛైర్మన్ బీఆర్ నాయుడు గతంలో ఈ అంశాన్ని ప్రస్తావించారు. దీన్నే తిరిగి అమలు చేసే అవకాశముంది.
- 30 సంవత్సరాల క్రితం వరకు సామాన్యభక్తుడు సైతం మూలవిరాట్‌ని అత్యంత దగ్గరగా అంటే కులశేఖరపడి వరకు వెళ్లి దర్శనం చేసుకునేవారు. ప్రస్తుతం వీఐపీలు, 10 వేల 500 రూపాయల దర్శనాలకు మాత్రమే అక్కడివరకు అనుమతినిస్తున్నారు.
- తరువాత కాలంలో లఘుదర్శనం అని ఏర్పాటు చేశారు. దీని ప్రకారం గరుడాళ్వార్‌ సన్నిధి నుంచి జయవిజయులను దాటి స్నపన మండపం వరకు వెళ్లి భక్తులు శ్రీవారిని దర్శనం చేసుకునేవారు.
- తరువాత దీన్ని సైతం రద్దు చేసి, గరుడాళ్వార్‌ సన్నిధి నుంచి దర్శనం కల్పిస్తున్నారు. దీనిని మహాలఘు దర్శనం అనే పేరు పెట్టారు.
- కనీసం లఘు దర్శనం కల్పిస్తే శ్రీనివాసుని సన్నిధిలో ప్రవేశించామన్న ఆ ఆనందానుభూతి భక్తులకు కలుగుతుంది. దీన్ని పాలక మండలి పరిగణలోకి తీసుకోవాలని భక్తులు కోరుతున్నారు.
- రద్దీ ఉన్న సమయాల్లో వైకుంఠం రెండో క్యూకాంప్లెక్స్‌లోనే దాదాపు 30 గంటల పాటు శ్రీవారి దర్శనం కోసం వేచిచూడాల్సి వస్తోంది.
- స్లాట్‌ దర్శనం అంటే శ్రీనివాసం, విష్ణునివాసంలో ఆధార్‌ కార్డు ద్వారా దర్శన టైమింగ్ కేటాయిస్తారు. దీంతో 2, 3 గంటల్లోనే దర్శనం పూర్తవుతుంది.
- అయితే ఈ టికెట్లు పరిమితం గానే ఉంటాయి. అదే విధంగా అలిపిరి, శ్రీవారి మెట్టు నుంచి కాలి నడకన వచ్చే భక్తులకు గతంలో దివ్యదర్శనం పేరుతో కొన్ని టికెట్లను కేటాయించేవారు. ఇలా కూడా 2, 3 గంటల్లోనే దర్శనం పూర్తయ్యేది.
- అయితే గత ప్రభుత్వం ఈ విధానాన్ని రద్దు చేసింది. నాయుడు టీమ్ పాత విధానాన్ని కొన్ని మార్పులు చేర్పులతో ప్రవేశపెట్టడానికి సన్నద్ధమవుతోంది .
- ఇది కార్యాచరణ లోకి వస్తే గంటలకొద్దీ శ్రీవారి దర్శనం కోసం పడిగాపులు కాస్తున్న భక్తికోటికి రెండు , మూడు గంటల వ్యవధిలో శ్రీవారి దర్శన భాగ్యం కలగబోతోంది .