‘భూమి మీద పుట్టిన ప్రతి ప్రాణి బతికి బట్టకట్టాలంటే ఆక్సిజన్ మస్ట్. అయితే మనం రోజూ ఎంత ఆక్సిజన్ పీల్చుకుంటాం. ఎంత అవసరం. ఎన్ని శ్వాసలు తీసుకుంటే మనం ఆరోగ్యంగా ఉన్నట్లు..’
కరోనా ప్రభావం శ్వాస సంబంధిత రోగులపై అధికంగా ఉన్న వేళ మీ ఊపిరితిత్తులు బాగా పనిచేస్తున్నాయో లేదో తెలుసుకోవడం ముఖ్యం
మీరు రోజూ ఎంత గాలి పీల్చుకుంటున్నారో, రోజుకు ఎన్నిసార్లు శ్వాస తీసుకుంటున్నారో ఎప్పుడైనా లెక్కించారా? ఆరోగ్యవంతులైన వారు నిమిషానికి 16 సార్లు శ్వాస తీసుకుంటారని అధ్యయనాలు చెబుతున్నాయి. . గటు వయోజన పురుషుని ఊపిరితిత్తులు గరిష్ఠంగా 6 లీటర్ల గాలిని వాటిలో ఉంచుకోగలవని అమెరికన్ లంగ్ అసోషియేషన్ తెలిపింది. అందులో సాధారణంగా పీల్చిన గాలితో పాటు అవసరానికి మించి తీసుకున్నది, సాధారణంగా వదిలిన గాలితో పాటు అవసరానికి మించి బయటకు వదిలినది, ఊపిరితిత్తుల్లో మిగిలి ఉన్న దానిని కూడా కలుపుకొని ఈ లెక్కలు వేశారు. ఇలా.. ప్రతి రోజూ ఒక వ్యక్తి 7,570 లీటర్ల వాయువును తీసుకుంటాడని సైన్టిఫిక్ లెక్క. మనం తీసుకునే గాలిలో 20శాతం ఆక్సిజన్, వదిలే గాలిలో 15శాతం ఆక్సిజన్ ఉంటుంది. అంటే ప్రతి శ్వాసకు 5 శాతం వాయువు.. కార్బన్ డై ఆక్సైడ్గా మారుతుంది. ఈ లెక్కన మనిషి ఒక రోజుకు 378 లీటర్ల స్వచ్ఛమైన ఆక్సిజన్ను వినియోగిస్తాడు. మన ఊపిరితిత్తుల నుంచి ఎంత గాలి వెళ్తుందో తెలుసుకోవడానికి ఓ విధానం ఉంది. ఒక నిర్దిష్ట పరిమాణంలో ఉన్న ప్లాస్టిక్ సంచి తీసుకొని, దానిలోకి గాలి వదలాలి. ప్రతి శ్వాసకు అది ఎంత నిండుతుందో చూడాలి. పూర్తిగా నిండటానికి ఎంత సయమం పడుతుందో లెక్కించడం ద్వారా ఓ అంచనాకు రావొచ్చు.
అల్ప శ్వాస రేటును బ్రాడిప్నియా అంటారు. శ్వాస రేటు నిమిషానికి 12 నుంచి 20 మధ్య ఉంటే వ్యక్తి ఆరోగ్యంగా ఉన్నట్లు. నిమిషానికి 10 సార్లు మాత్రమే శ్వాస తీసుకోవడం అంటే.. శ్వాసకోశ వ్యవస్థ బలహీనంగా ఉందని అర్థం.
ఒత్తిడిని తగ్గించడానికి సుదీర్ఘ శ్వాసలు ఉపకరిస్తాయి. అది గుండె కొట్టుకునే వేగాన్ని తగ్గించి.. రక్త పీడనాన్ని స్థిరీకరిస్తుంది.
శ్వాస రేటును ఎలా తెలుసుకోవాలి?
ప్రశాంతమైన వాతావరణంలో నిటారుగా కూర్చొని, సాధారణ పద్ధతిలోనే శ్వాస తీసుకోవాలి. ఒక్క నిమిషంలో మన కడుపు భాగం కానీ ఛాతి గానీ ఎన్నిసార్లు పెరుగుతుందో లెక్కించాలి. స్థిరమైన ఫలితాల కోసం.. ఇలానే కొన్నిసార్లు చేయాలి. ఆ తర్వాత వాటిని రాసుకుని చేసుకొని.. నిమిషానికి 12 నుంచి 20 శ్వాసలు తీసుకుంటున్నామో లేదా చూసుకోవాలి.